Расадникот кој функционира како засебна работна единица во рамките на Ј.П.”Охридски Комуналец”  располага со голем асортиман саден материјал со кој на граѓаните им овозможуваме да ги украсуваат и аранжираат своите дворови и тераси во секое годишно време. Во моментов покрај декоративните зимзелени, листопадни и украсни дрвја, располагаме и со цветен саден материјал од зимската и рано-пролетната цветна реколта.

Располагаме со садници од видот хибридна виола (очиња)  во одлична состојба и квалитет со разновиден колорит, потоа белис -перенис и каранфилчиња, кои се сега по намалени цени и пристапни за сите граѓани. Заедно со садниот материјал Ви нудиме и изработка  на идејни проекти  за уредување на  Вашите дворови.

 По барање на Градоначалникот на општина Охрид, Никола Бакрачески,екипите на Ј.П.„Охридски Комуналец„ дефинираа нови 40 локации за парковски решенија кои ќе бидат застапени во сите урбани заедници на општината. Желбата за чиста, здрава и зелена околина сега ќе им биде на дофат на сите граѓани преку оформувањето на овие катчиња во нивните дворови, населби и најблиската околина.

Во првата фаза би ги издвоиле следните локации: просторот околу Маларична, околу Т.Ц.„Гранит„ на „Булевар Туристичка„ , кај поранешниот т.н.„Мини-маркет„ , пресек „Булевар Туристичка„ и „Даме Груев„ кај „Тренд„ , влез „Проаква„ , „Никола Карев„ , влез Горна Порта, Сараиште, Саат Кула, поранешен наплатен центар на МРТ, во с.Пештани кај рибниот ресторан, с.Лескоец, с.Велгошти кај училиштето и градинката, просторот наспроти Противпожарната единица, социјалните згради на „Сирма Војвода„, инфо центарот на „Булевар Туристичка„ , пресек „Пере Тошев„ и „Булевар Туристичка„ , дворови на училиштата,  „Парк на пријателство„, „Скејт Парк„, „Мазија„ и др.

Денес е предвидено да биде завршено хортикултурното решение на парковскиот дел пред зградата „Ремис„ (позната како „кифла„). Тревниот  простор е обработен и уреден, а засадени  се 7 палми и 100  ружи.

Бетонската жардињера која се наоѓа помеѓу коловозните ленти на „Булевар Туристичка„ хортикултурно се дотерува. Сите оштетени садници на потегот од крстосницата кај гимназијата до крстсницата кај градскиот пазар се отстрануваат, земјената подлога се обработува и се засадуваат нови садници. Планирано е на овој потег да се засадат околу 60 нови садници од зимзелени и украсни видови кои на сообрќајницата ќе и дадат подобар естетски изглед, а во исто време нема да претставуваат  пречка во одвивањето на сообраќајот.

Во врска со написите пласирани на некои од електронските медиуми, дека опасен отпад е оставен во црни најлоски вреќи на просторот од поранешниот полигон за мали спортови, од Ј.П.„Охридски Комуналец„ ги информираат граѓаните дека не се работи за никаков опасен отпад, туку најобична трева. Според наше мислење или некој ја собрал околната трева за исхрана на животни, или пак некој несовесен поединец од околните куќи или згради го уредувал своето дворно место и зелениот отпад го фрлил на оваа локација. Нашите екипи веднаш излегоа на лице место и бидејќи се работи за приватен имот, издаден е налог од Општинскиот инспекторат. Ваквите простори кои се во приватна сопственост треба да ги одржуваат самите сопственици, или пак да склучат договор со јавното претпријатие, кое ќе ја одржува хигиената со соодветен надомест.

Во интерес на граѓаните на општина Охрид, денеска целиот простор се расчистува од натрупаниот отпад, каде поради отворениот пристап, многу често се создаваат мини-депонии.

Ј.П.Охридски Комуналец го оплеменува просторот кој се наоѓа во УЗ.Горна Влашка Маала, во близина на чинарот, на аголот од крстосницата на улиците „Питу Гули„ и „Марко Нестороски„. Овој простор ќе добие комплетно нов лик. Во почетната фаза просторот со специјална механизација се расчистува, теренот се израмнува, по што ќе следи реализацијата на партерното решение со кое е планирано поставување на бехатон подлога, фонтана, клупи и засадување на украсни садници. 

Продолжуваат акциите на Ј.П.„Охридски Комуналец„ за почист и поубав град, каде покрај подигнување на степенот на хигиена, сакаме да го имплементираме и едукативниот карактер за подигнување на еколошката самосвест кај жителите во секоја урбана заедница на општина Охрид.

Денес Ј.П.„Охридски Комуналец„ започна акција за расчистување на дивите депонии од градежен шут во УЗ.„Видобишта„ ,  на потегот од „Стобекс„ до АД.„Жито Леб„ по должина на ул.„Ристо Чадо„. Со специјална механизација темелно се расчистуваат дивите мини-депонии , а потоа теренот се израмнува. Акцијата во оваа урбана зедница ќе се реализира и во наредните денови, а ќе бидат ангажирани и метачите од „Јавна хигиена„ за финално чистење на потегот.

По налог на Општинскиот инспекторат, Ј.П.”Охридски  Комуналец”  спроведе акција за расчистување на Урбана заедница “Билјанини Извори”  во комплексот згради на ул.”Никола Карев”. Плански беше избран денешниот ден-сабота, кога повеќето жители од оваа населба се во своите домови, за да  се делува едукативно во подигнување на еколошката свест кај самите жители, затоа што населбата е нивно катче, а Ј.П.”Охридски  Комуналец”  не може да исчисти, колку што самите граѓани можат да загадат. Чистењето на дворните површини околу колективните станбени објекти, согласно законот за   Јавна чистота, не е обврска на Ј.П.”Охридски  Комуналец”  бидејќи истите не спаѓаат во јавни површини, но со цел почиста и здрава животна средина, се спроведе оваа акција во која се подигнати околу 40 вреќи отпад.

Ј.П.”Охридски Комуналец”  денес спроведе акција за расчистување на магистралниот пат Охрид-Скопје на потегот од сообраќајната клучка на влезот во Охрид до месноста Св.Еразмо. На овој потег , како последица на несовесно однесување на поединци, континуирано се создаваат мини-депонии од градежен шут, зелен и друг вид комунален отпад. По налог на Општинскиот инспекторат, Ј.П.”Охридски  Комуналец” пристапи кон расчистување на овој потег  со 4 вработени и собрани се 60 вреќи отпад.

Се надеваме дека во иднина ќе се применуваат ригорозните казни за загадување на околината со кои ќе се санкционираат несовесните граѓани.

Деновиве екипите на “Паркови и зеленило” при “Охридски Комуналец” го оплеменија просторот околу чинарот на ул. “Питу Гули” во Урбана заедница “Горна Влашка Мала”. Засадени  се 40 цветно декоративни садници, а екипи на Ј.П.”Градски Гробишта” ги заменија оштетените клупи. Со ова хортикултурно уредување локацијата која се наоѓа покрај фреквентна крстосница  доби нов лик.

Со вакви акции ќе продолжиме и во наредниот период создавајќи нови зелени катчиња на повеќе локации во сите урбани заедници во општина Охрид.

По предлог на Директорот на Ј.П.”Охридски Комуналец”, Елена Скрческа, денес  беше одржан состанок со претставници од Одделението за инспекциски надзор-Инспекторат и комуналните редари при локалната самоуправа.Целта на овој состанок, како што истакна Директорката Елена Скрческа , е подобрување на меѓусебна соработка и транспарентна комуникација  во 2014 год. во доменот на одржување на  јавната чистота, јавното зеленило и услужната хигиена. Бенефитите од подобрата взаемна соработка ќе се ефектуираат не само во работата на јавното претпријатие и Инспекторат, туку генерално во подобрување на сликата и имиџот на градот како наш најголем туристички центар.

    Од страна на претставници од комуналното претпријатие беа посочени најкритичните точки и проблеми со кои се соочуваат секојдневно: одржување на јавната чистота на “ТAXI” постојките, каде таксистите го загадуваат просторот со отпушоци и отпадоци, проблемот со отпушоците кои ги расфрлаат дел од вработените од локалите по градската чаршија и “Македонски Просветители”, преполнување на кантите (чија намена е депонирање на ситен отпад) со комунален отпад по градската чаршија и други фреквентни сообраќајници, несоодветно депонирање и оставање на комуналниот отпад кај индивидуалните објекти на ул.”Гоце Делчев” , ул.”7-ми Ноември” и “Стив Наумов”, потоа критични точки каде се злоупотребува намената на контејнерите на ул.”Егејска” , ул”Сатеска” и ул.”Васил Стефоски”, непристапност на нашето возило од паркирани возила до поранешната зграда на МТВ  и др. Во поглед на одржување на јавното зеленило најголем проблем создаваат домашните миленици, најмногу кучињата, кои ги уништуваат парковите. Од Инспекторатот беше посочено дека голем проблем е одржувањето на зеленилото од индивидуалните објекти кое ги загрозува јавните пешачки зони и површини, како и одржувањето на локации кои се наоѓаат на фреквентни локации  и се во приватна сопственост, а сопствениците не ги одржуваат.

Донесени се голем број  заклучоци, идеи и  предлози за подобрување на комуналната хигиена и јавното зеленило, кои заеднички Комуналец и Инспекторатот во 2014  год. ќе ги реализираат.