По налог на Општинскиот инспекторат Ј.П.„Охридски Комуналец„ спроведува акција за расчистување на потегот од под Калето, околу комплексот згради на ул.„Крум Точко„ , кај фудбалското игралиште во месноста Грашница, вливот на река Грашница во Охридско Езеро и кај амбулантата „Воска„. Ангажирани се пет работници кои го расчистуваат расфрланиот комунален отпад (пластика, најлон кеси, хартиени отпадоци и др.) и мини-депонијата од градежен шут кај амбулантата.

Апелираме до граѓаните ваквите грди слики  да не се повторат, зошто несовесното однесување на поединци остава трајни последици по степенот на хигиена на целиот град, а со расфрлањето на отпад на овој потег посредно  се загадува и езерото.

Согласно Програмата за работа на Ј.П.„Охридски Комуналец„ за 2014 год., со доаѓањето на пролетта се интензивираа активностите за дотерување и освежување на градот пред туристичката сезона. Во рамките на проектираните активности за одржување на јавно-прометните површини и јавните добра, на градскиот плоштад се изврши фарбање на клупите и корпите за ситен отпад, а кај дел од нив се изврши санација.

Во реализацијата  на националната еколошка кампања „Македонија земја на цвеќето-Земја на розата„ која ја спроведува Министерството за животна средина и просторно планирање, денес активно се вклучи и општина Охрид и Ј.П.„Охридски Комуналец„, со што симболично го означивме и стартот на пролетта. Во рамките на оваа кампања  Ј.П.„Охридски Комуналец„, планира да засади 2.000 садници ружи  на целата територија на општината, а денес беа засадени ружи на „Булевар Туристичка„ (потег градски пазар-Петља), месноста „Долни Сарај„ (по барање на Фестивалот „Охридско лето„)   и во основните училишта „Григор Прличев„ и „Христо Узунов„.

Со оваа кампања се надеваме дека ќе влијаеме позитивно и едукативно како кај најмладата популација, така и кај сите граѓани, со цел урбаните средини да ги претвориме во цветни градини и прочистувачи на загдениот воздух

Со официјалното завршување на зимскиот режим на сообраќај, Ј.П.Охридски Комуналец пристапи кон темелно расчистување на магистралните сообраќајници „Железничка„ и „15-ти Корпус„, кои во текот на зимскиот период беа одржувани од страна на „Македонија пат„. Коловозот и околниот простор детално се расчистуваат од абразивните средства, што ќе овозможи понатамашно полесно одржување на овие сообраќајници, вклучувајќи и машинско чистење.

Денес екипите на Ј.П.„Охридски Комуналец„ спроведоа акција за расчистување на потегот од црквата Св.Богородица Каменско  до пресекот со ул.„Кирил и Методиј„ . Се расчистуваше поширокиот дел од шумскиот појас од расфрлан комунален и кабаст отпад, како и градежен шут и собрани се 5м3 отпад . Овие вонредни активности  ги спроведуваме по претходно добиен налог од Општинскиот инспекторат.

Благодарение на поволните временски услови  Ј.П.Охридски Комуналец секојдневно е на терен на повеќе локации во градот и пошироката околина, реализирајќи го проектот зацртан од Градоначалникот на општина Охрид, Никола Бакрачески, за создавање нови 40 зелени катчиња, кои секојдневно никнуваат и го красат нашиот град. Денеска во присуство на Градоначалникот Никола Бакрачески, пратеникот Александар Николоски, Секретарот на општина Охрид, Димитар Спасески, Директорката на Ј.П.„Охридски Комуналец„, Елена Скрческа, претставник од фирмата Левидиа Дооел., Јасмина Луканова и др., се уредуваше зацртаното зелено катче во близина на Горна Порта , каде заради зачувување на автентичноста на просторот беа засадени 30 садници бадеми, донација од фирмата Левидиа Дооел. Во наредниот период во ралмките на донацијата ќе бидат засадени уште 150 садници бадем по охридското Кале.   

Според утврдената динамика од страна на општина Охрид за создавање  40 нови зелени катчиња на целата територија на општина Охрид,  Ј.П.Охридски Комуналец хортикултурно го  оплемени новоуредениот простор кој се наоѓа во УЗ.Горна Влашка Маала, во близина на чинарот, на аголот од крстосницата на улиците „Питу Гули„ и „Марко Нестороски„. Засадена е трева, 150 сезонски цвеќа и 30 декоративни садници.

Во одржувањето на јавното зеленило по јавно-прометните површини Ј.П.„Охридски Комуналец„ секојдневно се сретнува со проблеми  кои произлегуваат од одржувањето на оградите, дрвјата и жбуновите кои од приватните имоти се шират на јавните пешачки површини и сообраќајниците.

По налог на Општинскиот инспекторат се санираше состојбата на пешачката патека по ул.„Марко Цепенков„ на потегот од кружниот тек на ул.„Питу Гули„ до месноста „Стобекс„. Отстранети се делови од зелената жива ограда, гранки од дрвја и  диви жбунови  од приватните имоти кои го попречуваа движењето на пешаците  и ја попречуваа видливост на сообраќајните знаци.

Упатуваме апел до граѓаните дека се сами должни да го одржуваат зеленилото на своите имоти кое не смее да преминува на јавна површина и дека согласно  Законот за јавна чистота овие дејствија подлежат на ригорозни казни.  

Во текот на оваа работна недела екипите на  „Паркови и Зеленило„ вршат пролетно средување на дрворедот вдолж сообраќајницата „Булевар Туристичка„. Оштетените дрвја се санираат, сувите и искршени гранки се отстрануваат, а крошните се оформуваат. Исто така се коси  тревниот дел вдолж оваа сообраќајница на потегот од крстосницата кај Градскиот пазар до месноста Петља.

По налог на Опшинскиот инспекторат е извршено чистење на крајбрежниот појас по градскиот кеј (во близина на Холандски Парк).  Поради нискиот водостој во овој дел од крајбрежниот појас се натрупани големи количини муљ, па пристапено е кон расчистување со багерување со употреба на специјална механизација. Подигнати се и транспортирани 30м3 муљ и друг вид отпад. Оваа активност ја спроведуваме согласно годишната програма за Јавна хигиена во доменот на вонредни активности.

Во одржувањето на јавната чистота на јавно-прометните  површини кои согласно законот за Јавна чистота се точно дефинирани и истите треба да ги одржува Ј.П.„Охридски Комуналец„ , секојдневно се соочуваме со проблеми кои произлегуваат од создавањето  мини-депонии на приватни имоти. Овие мини-депонии се наоѓаат на многу фреквентни локации и претставуваат грда слика и опасност  за сите граѓани. Денеска по налог на Општинскиот инспекторат се расчистуваше локацијата која е во приватна сопственост, (просторот беше целосно запоставен од сопствениците), а се наоѓа покрај најфреквентната сообраќајница во Охрид-„Булевар Туристичка„ , во близина на градскиот пазар.

Подигнати се енормни количини зелен и расфрлан комунален отпад.

Расадникот кој функционира како засебна работна единица во рамките на Ј.П.”Охридски Комуналец”  располага со голем асортиман саден материјал со кој на граѓаните им овозможуваме да ги украсуваат и аранжираат своите дворови и тераси во секое годишно време. Во моментов покрај декоративните зимзелени, листопадни и украсни дрвја, располагаме и со цветен саден материјал од зимската и рано-пролетната цветна реколта.

Располагаме со садници од видот хибридна виола (очиња)  во одлична состојба и квалитет со разновиден колорит, потоа белис -перенис и каранфилчиња, кои се сега по намалени цени и пристапни за сите граѓани. Заедно со садниот материјал Ви нудиме и изработка  на идејни проекти  за уредување на  Вашите дворови.